قـصـة (أنس وزياد) اتمنى الكل يقراها ويستفيد منها

السلام عليكم ورحمة الله وبركاته
قصه اعجبتني وقلت انزلها لكي يستفيد منها الجميع
واتركم مع القصه:
استغليت الاجازه الاسبوعيه ونويت اروح لمكه اخذ عمره واصلي الجمعه بالحرم .. طبعا نمت عند خاله) لي هناك
وبيوم الجمعه وقبل ما جيت اسافر .. سلمت على خالتي وعيالها ناديت هالطفل وعطيته مبلغ بسيط وقلت له ان هالفلوس لفطور يوم السبت .. اخذها ووقف شوي وطالع فيني وسألني سؤال ..!!
الطفل/ ممكن تعطيني فلوس زياده عشان زياد ؟
انا / من زياد ؟؟
الطفل / زياد صاحبي في المدرسه
انا / وليه ؟؟ لا يكون متسلف منه بس ؟؟
قاطعتنا امه / لا انت ما تدري وش الموضوع اصلا .. كنا نعطي انس (( انس هو ولد خالتي )) 5 ريال لفطوره وبيوم صار يطلب 10 .. عطيناه في البدايه .. لكن صار يطلب كل يوم 10 كل يوم 10 ..
جاه ابوه وسأله .. وانت وش تسوي بال 10 ؟؟
قال له يابوي عشان زياد
ابوه / ومن زياد ذا ؟
انس/ زياد ذا صاحبي اليتيم
ابوه / اليتيم ؟
انس/ ايوا زياد ذا امه وابوه ماتو وما صار له احد
ابوه وهو مستغرب / طيب وش تسوي بال10 انت ؟
انس / يابابا حنا لما نجي نفطر اشوفه جالس لحاله وبدون فطور .. وانا اخذ ال5 الزياده عشانه عشان يقدر يشتري له فطور مثلنا ما يقعد جوعان ما عنده لا عصير ولا بطاطس
من بعدها صار الابو يعطيه عشره وصارت الام تسوي ساندوتشات بالبيت له ولزياد ..
وصار انس ومن عمره 6 سنوات (( كافل يتيم ))
هالموقف صدمني وبقوه بعد
الله يا هالطفل قد ايش قلبه كبير .. يطلب امه وابوه فلوس عشان ما يشوف غيره محروم .. طفل حس بقيمه اليتيم
الي للاسف نسيوه الكبار .
انا فكرت وشلون حنا اصحاب الرواتب والدخل ما سوينا مثله
5 ريال بدال ما تنحط بدخان ليه ما تنحط بيتيم ؟؟
الواحد منا يشحذ قيمه علبة المارلبورو ولا فكر مثل ما فكر هالطفل
ليه وصلنا لهالدرجه ... ونسينا اليتيم ؟؟
انا ما اقول رح اعطي الي يوقفون بالاشارات .. لكن اكيد انت او قريب لك يعرف يتيم .. تقدرون تساعدونه
زياد حاله ظهرت لي بالصدفة لأني ومثلي كثير ما بحثنا ورا زياد والي مثله ويا كثرهم
وش كثر الشخص يحزن لدمعة اليتيم ووش كثر يفرح لابتسامته حتى لو ان هالابتسامه ضايعه بضياع أهله
كل ما افكر بالي سواه ولد خالتي استحي .. ليه ما فكرت بيوم اسوي مثله ؟؟!!
وهل جمعيات رعاية الايتام فعلا ترعا اليتيم او ترعا الفلوس الي تجي له من الناس ؟؟
بعض النفوس تستحرق اليتيم وتستهزئ به وممكن توصل لضربه .!!
وصل في بعضنا الكبر والغطرسه انه يتكبر على يتيم الي وصى الرسول صلى الله عليه وسلم برعايته
بعض الاطفال مواقفه اكبر منهم .. من بعد هالموقف استحي اقول لشخص ما ان عقله عقل بزر .. لأن البزر سوا الي هالشخص ما سواه ولا فكر حتى تفكير بانه يسويه
قال الرسول صلى الله عليه وسلم (( انا وكافل اليتيم كهاتين في الجنة.. واشار لاصبعيه الوسطا والسبابه )) .
اظن وبعد هالحديث مافي كلام ينقال .. لكن فيه افعال بتصير
هذا الكلام منقول للاستفاده