لوعة قلبي الجراح

بسم الله الرحمن الرحيم

فاتن : يمة قومي الله يخليك خلينا نروح المستشفى شكلك تعبانه

ام سند : يا بنتي وربي ذبحتني المستشفيات وما صارت كل يوم أنا وياك رايحين جايين وما معنا الا السواق العالم وش يقولون علينا

فاتن : الله عاد يمه هالأسواق والمنتزهات اللي نروح لها ما غير المدرسة والمستشفيات وبس واللي بيقول يقول دام احنا واثقين بانفسنا

ام سند:ما قول غير الله يصلحك يالله قومي ذاكري شدي حيلك قربت الامتحانات

فاتن : أقوم بس توعديني انه إذا زاد عليك التعب نروح المستشفى يمة أنا مالي غيرك ..

(( أبو فاتن وأخوها سند توفوا بحادث سيارة قبل 3 سنوات وكان عمرها وقتها 15 سنة ومن يوم الحادثة لليوم يزيد تعلقها بأمها أكثر وأكثر ))

ووقت ما كانت فاتن تذاكر بالغرفة حست عمرها عطشانة وطلعت تشرب وبطريقها مرت بغرفة أمها اللي كانت تعبانة وتكابر وتحاول تخفي الألم

فاتن : يمه وش فيك بسم الله يالله قومي معي نروح المستشفى

أم سند : ميخالف يا بنتي ننتظر للصبح روحي كملي مذاكرتك ..

فاتن : وش مذاكرته يمه الله يخليك انت تعبانه مرة لازم نروح

أم سند : وأنا أمك الوقت متأخر وما يصير نطلع لحالنا بها لساعة

فاتن : طيب يمة تكلمين ولد خالتي خالد يودينا إذا ما تبين السواق

أم سند : والله يمة الوقت متأخر عيب نخرع الرجال .

فاتن تنظر لامها نظرات رجاء .

أم سند : فتونتي يمة بكره من الصبح أنا وإنت عند الدكتور ولا تزعلين الحين ذاكري ولا نامي بكرة ورانا المستشفى ..

فاتن : وهي بغرفتها تفكر بحال أمها المريضة وحاجتهم لرجل بحياتهم وشوقها لابوها واخوها سند ونامت وهي تفكر ...

*******************************************
في الصباح ..

خالد : يبة صبحك الله بالخير

ابو خالد : صباح النور يا بوك ما قمت أشوفك .

خالد : آسف والله يبة انشغلت تعرف الحين لازم الجهد يتضاعف الناس على اختبارات والطلاب محتاجيني بكل دقيقة وبعد الدوام أنام ولا أقوم إلا حول 6 المغرب ولا تكون موجود بالبيت اقعد مع البنات شوي ثم أروح النادي وأمر خالتي ولا ارجع إلا و انت نايم

ابوخالد : اقول خويلد ماكان سؤال عطيتني تقريرك اليومي

خالد : هههههههههههه ابوي حبيبي لازم اقنعك علشان ماتزعل علي

ابوخالد : اقول اركد وخلك رجال بس .

ويقوم ابوخالد يبي يروح مزرعتة وخالد يفكر بينه وبين نفسه ويقول :

( اليوم خميس وما عندي شي ليه ما أروح لخالتي وأشوفها لي أسبوع عنها بس الساعة 9 بدري لا لا خالتي تقوم بدري أروح ما بأخسر شي )

وبيت أم سند ..

فاتن بعدها نايمة وأمها بالمطبخ تشرف على الخادمة وهي تسوي الفطور وخلال ما أم فاتن بالمطبخ يطق جرس الباب وتروح الخادمة تشوف مين على الباب ..

يدخل خالد المطبخ ويوقف ورى خالته

خالد : ماشاللة وش هالنشاط خالتي تضبط قهوة ياسلااااااااااام
ام سند : بسم الله الرحمن الرحيم الناس تسلم وتصبح وش بلاك ياخالد

خالد :هههههههههه اسفين ياخاله المهم وشلونك اليوم ؟؟

ام سند : الحمدلله وشلون ابوك ومرته وخواتك ؟؟

خالد : بخير ويسلمون عليك .

(( توفت ام خالد وهو بالصف الرابع الابتدائي وبعد سنتين تزوج ابوه وعنده ثلاث اخوات وهو مدرس تاريخ عمرة26سنة ))

أم سند : خالد حبيبي روح بالصالة الحين أجيك وخل المطبخ للحريم .

فاتن أمام المرآه وتمشط شعرها الطويل اسود ناعم وتربطه بربطة ناعمة ومع بيجامتها الودري شكلها جنان فاتن بنت حلوه بيضاء نعومه مره نحيفة وملامحها هادية لكن مي طويلة مره طولها عادي

فاتن وهي تنزل مع الدرج كانت تلعب بجوالها وتدخل الصالة وهي تلعب بالجوال ولذلك ماانتبهت ان فيه احد .

خالد وهو يناظر التلفزيون بالصالة شاف ملاك داخله علية
خالد مهو مصدق اللي يشوفه سبحان اللي خلقها معقوله هذي فاتن ..
وبعد ما دخلت فاتن حطت الجوال على المكتبة وتناظر إلا خالد ولد خالتها جالس لحظة لا تحسد عليها تمنت الأرض تنشق وتبلعها ولا ها لفشيلة ارتبكت وطلعت غرفتها جري ودخلت غرفتها وهي ترجف ياربي وش هالفشيلة يا الله اكيد انتبه لي الحين وش يقول عني بس انا وش ذنبي ماتوقعت انه عندنا الحين 10 الصبح احسن حل انادي سيري ( الخادمة ) تجيب لي الفطور فوق ..

وتقوم فاتن وتفطر وهي تتصفح الإنترنت وبعدين ملت وتذكرت إنها لازم تروح مع امها المستشفى وممكن تكون روحة المستشفى هي سبب وجود خالد الحين ..

فاتن تنادي سيري وتقولها روحي قولي لماما نروح المستشفى مافي وقت

تدخل الخادمة الصالة إلا خالد يسولف لخالتة عن سالفة قالتها له مرة ابوه ..

خالد : والله يا خالة مدري بعدني أفكر وأبوي متحمس للسالفة وأحس إني متردد ومرة ابوي تقول هذي بنت اخوي اعرفها واعرف تربيتها ويا خالد تصلح لك و إنت متى ما قررت كلمت اخوي

أم سند : والله يا خالد أنا شفت البنت عندكم مرتين بالبيت حلوه وهادية ومؤدبة وما عليها كلام وأنا خالتك لا تتردد استخير واستشير وفكر واللي ترتاح له سوه والله أنا ودي أشوفك معرس اليوم قبل بكرا .

خالد : انشالله اللي الله كاتبه بيصير

وبهاللحظة تدخل الخادمة ..
ماما : فاتن فيه كلام قول انته متى روه مستسفى فاتن قول تأخر انتو

خالد وهو يحس قلبه يرجف : خالتي فاتن فيها شي .

أم سند : لا ما فيها إلا العافية الله يهديها تعبت أمس تعب بسيط وأقلقتني تبينا نروح المستشفى .

خالد سلامتك يا خالتي وفاتن صادقة ماعندنا أهم منك نطمن عليك يالله قومي البسي و إن شاء الله نلحق أنا انتظركم بالسيارة .

أم سند : خالد يمه لا تكلف على نفسك نروح مع السواق انت اكيد عندك اشغال

خالد : افا يا خالتي ما هقيتها منك أنا أفرغ نفسي لكم و بأعتبر عمري ماسمعت شي وانا بالسيارة .

فاتن : سيري يا سيري ياسيييييييييري

أم سند : فاتن وش فيك تصارخين المرة بالحوش يالله بروح المستشفى يمه انتبهي لعمرك .

فاتن : يمة بروح معك وش تروحين لحالك الله يهديك .

أم سند : لا معي خالد .

فاتن بعد ماسمعت اسم خالد بتردد : حتى لو بروح

أم سند: يالله بسرعة اجل .

خالد بالسيارة يفكر ( يا ربي وش صار لي أنا جيت لخالتي مقتنع إني أخطب بنت اخوي مرة ابوي وابي خالتي تروح معها وش اللي غير رأيي وخلاني افهم خالتي إني ماني متحمس للبنت وانقهرت لما شجعتني تمنيتها ترفض.. يالله مو معقولة فاتن كبرت وصارت قمر بريأه مثل ماهي وبعدين انا ليه خفت يوم فهمت غلط ان فاتن تعبانه يمكن لأني دوم أحس إن أنا المسؤول عنها وتدخل خالته السيارة وتقطع عليه افكاره )

أم سند : خالد لا يكون تأخرنا عليك ؟؟

خالد : لا والله ماتأخرتوا وانتبه لوجود فاتن الي كانت بتموت من الحيا وعينها بالارض وساااااااكته ..

خالد : هلا فاتن وشلونك ؟؟

فاتن بصوت لا يكاد يسمع : الحمدلله تمام

خالد: تبين مستشفى معين ياخالة ..

أم سند : أي والله مستشفى (............)

خالد : ابشري ..

فاتن : تلوم نفسها يا ربي وش فيني ارجف وإذا شافني بالغلط خلاص ما صار شي ماله داعي اللي أسويه بنفسي بس كل مره اشوف فيها خالد يكون أحلى من أول ..

((خالد شاب اسمر طويل مليح جدا انفه دقيق وعيونه وساع حلوه ابتسامته جذابه وتعذب شعرة اسود وناعم ))

خالد بعد ما وصلوا ودخلت خالته وفاتن للدكتور ..
خالد : بشري ياخالة ؟؟

أم سند : على الله ياولدي طلب مني تحاليل والنتيجة بعد كم يوم فيه مراجعه

خالد : متى المراجعة ؟؟

أم سند : الثلاثاء . 10 الصباح

خالد : خير انشالله ..

ويوصلهم خالد البيت .

وبيوم الاثنين بالليل ..

فاتن : يممممممه الله يخليك علشان خاطري ..

أم سند: انا قلت لأ يعني لأ عندك مدرسة بروح ومعي سواقي وخدامتي ما علي خلاف انشاء الله وماله داعي تغيبين غيابك كثر يالله روحي نامي بتقومين بدري

راحت فاتن غرفتها وهي تفكر بأمها وإنها ودها تروح مع أمها الطبيب لكن أمها رافضة بسبب مدرستها
********************************************
.
الثلاثاء الساعة 9 الصباح خالد ببيت خالته
أم سند : هلا خالد حياك الله ياوليدي عسى ماشر فيه شي

خالد : ههههه ما في إلا العافية انشالله بس جيت بروح معك المستشفى موعدك ولا نسيتي ..

أم سند : هه ودوامك يممه

خالد : استأذنت كم خاله عندي

أم سند : الله يجزاك خير والله إن ربي عوضني فيك عن سند وأبوه

خالد : و انت يا خاله مكان امي ويالله عن الأفلام الهندية .

خالد وأم سند بالمستشفى ..

الدكتور : والله ما بخبيش عليكو الحاله مابتريحش ولازم عملية والعملية دية ما بتنفعش الا برا وانا من رأيي انكو ترسلو اوراق الحالة وتبدو باسرع مايمكن بالإجراءات ماينفعش تضيعوا وقت .

أم سند بالسيارة سااااااااااكته

خالد: توكلي على الله يا خاله هذا المقدر والمكتوب وأنا رأيي من رأي الدكتور نتوكل على الباري ونجري العملية مافي حل

أم سند : أي ياخالد بس مو الحين مابقى على الصيف الا شهر ةالحين اختبارات فاتن وحوسه بعدها انشالله نروح

خالد: لا يا خاله الله يصلحك وش اللي بعد شهر حالتك ماتتحمل وكفاية اهمال بصحتك الحين يعني الحين وانا بأوديك بنفسي .

أم سند : وفاتن ؟؟

خالد : يا تروح عند أهل أبوها ولا تروح معنا

أم سند : أهل أبوها مايبون لنا ريحة ما غير آخر الشهر يرسلون لنا فلوس من نصيب المرحوم بالشركة ونعمه إنهم يرسلونها لنا والله لو خليت بنتي عندهم ما عاد أشوفها.

خالد : طيب وش رايك نخلي فاتن ببيتنا عند خواتي والله بيراعونها
أم سند : لا يمه ما يصير عيب أكلف على أبوك مهما كان ما في حل إلا بالصيف

خالد : لا دام كذا ناخذ فاتن معنا ..
أم فاتن رجعت بيتها وحالتها حالة رجعت حول 1 ونص الظهر وبهالوقت وصلت فاتن للبيت وتوجهت مباشرة لغرفة امها .

فاتن تطق الباب وتدخل ..

فاتن بعد ماقبلت امها : يمة حبيبتي شلونك وش قالك الطبيب ؟؟

الأم : يقول إرهاق بسيط ومافيني الا العافية وانا قلت لك مافيني شي بس انت الله يهديك .

فاتن تضم (تحضن ـ تلم ) امها وتقولها لوما اطمن على صحتك يا احلى ام بالدنيا على صحة مين اطمن يالله يمك ما ودك نتغدى والا بتجوعيني ..

الام : يابعد قلبي الغداء جاهز وينتظرك .

وبعد الغداء ذهبت فاتن تسترجع دروسها وعندها اختبار مهم لذلك ما نامت وقررت تذاكر وماتضيع وقت ووالدتها كان شاغل بالها موضوع السفر لكنها فكرت واتخذت القرار ..

الساعة 7 ونص مساءً ..

**********************************************
أم حنان ( مرة ابوه ): خاااااالد خاااااااالد قوم يمه عورت قلبي حلقي انشق وانا اصحي فيك قوووووم ..

خالد وهو يتثاوب : عمتي الساعة كم ؟؟
أم حنان: 7 ونص والله انك رقود قم غسل وانزلي بالصالة أبيك ..

وفترة بسيطة وينزل خالد لعمته ..

خالد : هلا ياعمتي آمريني ..
أم حنان : مايصير اتقهوى معك يعني ابي اشوفك واسولف معك .
خالد : ههههههه من زين سواليفي مو دوم تقولي لي اركد واعقل ومن هالحكي .

أم حنان : من حرصي عليك ياخالد
خالد : ادري والله انك ماتقصرين الله يخليك لنا انشالله
أم حنان : خالد وش حلم أي أم وأب بالدنيا .
خالد يناظر فيها بنظرات استهبال ( مايدري عن شي).
أم حنان : انهم يزوجون ولدهم ويشوفون عياله وأبوك بخاطرة يزوجك انت عمرك 26 سنة وانا مثل امك وانتظر هاليوم على احر من الجمر .

خالد وهو يناظر الأرض وباين عليه الضيق ..
بصراحه انا معك بكل كلمة لكن ودي أأجل الموضوع شوي .

أم حنان: وليه تأجل وإلى متى وانت تماطل والله انك بكرة تندم على الأيام اللي تضيع منك .

أم حنان بعد فترة من الصمت ..

خالد صارحني مو عاجبتك بنت اخوي اوماتبيها قول .

خالد : لا ياعمة لاتفهمين الموضوع كذا والنعم ببنت اخوك مافيها شي وانا ماني رافضها بس بجد احس بتردد ولما استخير ما أخفيك أشعر براحة كبيييرة لكن بعدين اتردد ليه مادري

أم حنان : طبيعي يمة التردد والقلق الموضوع مو هين هذي حياة ودنيا وكل العرسان يمرون بهالفترة لين ماياخذون على الوضع والحياة الجديدة ..

خالد : ههههههه يعني الحين انا عريس ؟؟
أم حنان : الحمدلله والشكر وش نقول احنا من الصبح المهم خلك من الهرج الفاضي وقول نتوكل على الله وافاتح ابوك بالموضوع ؟؟

خالد : سوي اللي تبينه ..

وماصدقت أم حنان على الله ان خالد وافق ولو انه ماكان مقتنع مرة .

( حنان ) الاخت الأولى لخالد عمرها 23سنة ..

( حنان تزوجت من سعود وعمرها 19 وكانت بينها وبينه علاقة حب قبل الزواج من وقت ماكانت بالمتوسط وهو كان اول حب بحياتها وتزوجت منه بعد الثانوي واهلها مايدرون عن اللي كان بينهم بس ام زوجها واخته ناهد هم اللي يدرون )

حنان والدموع مغرقة وجهها ..
انت من جدك والا تمزح معي ..؟؟؟ كلمني جد .

سعود : حبيبتي المواضيع هذي مافيها مزح وتأكدي اني احبك بجنوون وبدونك ما اقدر اعيش بس انا مضطر غصب علي ..

حنان : وشو اللي غصب عليك .؟؟ تتزوج علي وتقول لي غصب عليك ؟؟
مافي احد يتزوج بالغصب وانا متأكدة ان اهلك مالهم دخل بالموضوع من دخل السالفة براسك ..

سعود : انا رجال واسوي اللي انا مقتنع فيه مافي احد يجبرني او يدخل سالفة براسي والدين والعقل معي من حقي انا ابي عيال .

حنان : وانا بعد ابي عيال وهذا امر الله وتونا مالنا اربع سنين متزوجين ما امداك تمل حرام عليك . وبعدين انا ممكن اتعالج وانت عارف اني مستمرة من سنة ونص بالعلاج .

سعود : ادري بس انت عارفة ان علاجك ياخذ وقت طويل بالمره وانا ياحنان ابيلي ولد .

حنان تروح غرفتها وهي منهارة ومالها الا الوسادة تواسيها وتبكي بحرقة ودموعها مغرقة الوسادة وتدعي ربها يحل لها مشكلتها ..

سعود : حبي افتحي الباب خلينا نتفاهم حنان ما اقدر اسمعك تبكين وانا ماني جنبك اواسيك حناااااااان

حنان : انت سبب دموعي حرام عليك سعود احنا اللي بيننا مو عادي وسهل انا تحديت العالم واهلي وامي وابوي علشان آخذك حرمت نفسي من أشياء واجد وغيرت حياتي بس علشان ارضيك وبالنهاية هذي جزاتي تدور على غيري .. انا مو ماليه عينك ؟؟..
سعود : ومن قال كذا ياقلبي انت كل حياتي انا ما اشوف غيرك بس قلت لك ابي عيال ارجوك افتحي الباب ..

حنان : ماترد
سعود : حنان ويطق الباب بقوة
حنان : سعود ارجوك خلني لوحدي ..

ويطلع سعود من البيت ويروح لأمه وخواته يزورهم وقال لأمه على السالفة ..

أم سعود : سعودوه انت عارف وش تقول وش تخربط مو هذه حنان اللي تحديت الكون لأجلها واخذتها غصب على الكل الحين جاي تقول بتتزوج عليها .

سعود : ياعالم وش فيكم هذا شرع الله حرام عليكم الزواج حلال ومن حقي اجيب 3 بدال الوحدة

أم سعود : حشى منت بصاحي تجمع الحريم والبزارين على راسك وتجيب لعمرك الغم احد ياولدي يدور الشقا كفاية مرة وحدة وبتجيب لك عيال بحول الله لا تستعجل وانت تحبها وهي تحبك شيل هالفكرة من راسك وانا أمك .

سعود : يمة أنا قررت وقفلي الموضوع بليز بالبيت نكد وهنا نكد .

*********************************************

خالد بعد مافاتحت عمته ابوه بالموضوع وقررو يروحون للبنت خالد يفكر ياترى هالخطوة اللي خطاها صح والا غلط معقولة خالد بعد مافكر بدال المرة الف بشريكة حياته كيف بتكون ياخذ وحده ما يدري عنها شي الا انها بنت اخو مرة ابوه وبالجامعة مع اخته ( منال )ومزعجتهم فيها بس منال دوم تمدحها وتشكر فيها .

خالد وهو يكلم نفسة ( طيب ابوي تزوج بهالطريقه والعالم كلة ليه انا اللي ابي اشذ واتزوج وحده انا احبها وابيها ليه خلاص انا لازم ارضى بالواقع وعلى الله سبحانه والمكتوب على الجبين لازم تشوفه العين )..

أم حنان تدخل على خالد تطق على خالد باب الغرفه
خالد : تفضل .
أم حنان : خالد يمه كلمت مرة اخوي وقالت الله يحييكم بروح لها انا وخالتك وانت وابوك تقابلون اخوي وتخطبون البنت الله يوفقك يمة ويسعدك .

خالد وكانه يسمع صواعق مو مصدق منصدم .

خالد : عمتي ماشالله ب3 ايام صار كل ذا .؟؟

أم حنان : هههههههه من فرحتي فيك شغل حامي ماعندي وقت ابي افتك منك

خالد : هههه ( وبدون نفس من الصدمة ) الله يسامحك مهما تسوين غاثك غاثك . انا بمر خالتي اسلم عليها وأقولها على سالفتي توصين شي ؟؟

أم حنان : سلم عليها وانتبه لنفسك واذا بتتعشى عندها قوللي مو ننتظرك مثل ذيك المرة يوم تغديت عندهم وماقلت لنا .

خالد : انشالله

ويروح خالد لبيت خالته وهو عند الباب كانت فاتن تذاكر بغرفتها وهي تذاكر سمعت صوت سيارة تحت غرفتها وناظرت لقتها سيارة خالد وشوي ينزل خالد من سيارته كان لابس بنطلون جنز وبلوز اسود وشكله جنان لحظتها .
فاتن وقلبها يدق بسرعة جنونيه وحاضنه الكتاب وتحاول تهدي نفسها وتكلم عمرها ياربي وش صار فيني ومعقولة اللي صاير لي يااااارب معقول أحبه ؟؟
وأخيرا اعترفت فاتن لنفسها بانها تحب خالد بعد عناد ومكابرة وصراع مع نفسها اخيييييييرا اعترفت

منقول

طيب مالها نهايه
لازم تكملون القصه تحمست

يسلمو خيوو
لاعدمناك

.~.مهره.~. كتب:: طيب مالها نهايه
لازم تكملون القصه تحمست

يسلمو خيوو
لاعدمناك

الا انشالله لها تكمله راح تنزل السنه الجايه Basketball

بعد باب الحاره برمضان الجاي .

ذكريني بس انتي وازهليها .. tongue

يالله عاد بلا استهبال كملوهاااااا ..

يؤ طويله ما فيه اختصار لها

واحد عجاز يكمل القراءه

نزلوها بشريط علشان نسمعها بالسياره